Еден куп странски танчерки и пејачки нелегално работат низ локали во гостиварско

Девојки од Албанија, Србија, Косово, Бугарија во потрага по заработувачка завршуваат како танчерки и пејачки во барови и кафеани на поширокото гостиварско подрачје. Во земјава престојуваат непријавено или спротивно на целта, односно го злупотребуваат туристичкиот престој, а не ретко се вмешани и во проституција.

Акциите што години наназад ги спроведува полицијата не ги одвраќаат газдите на локалите и странските државјанки да продолжат со истиот „бизнис“. Од почетокот на годината Секторот за внатрешни работи Тетово спровел вкупно осум акциски контроли во угостителски објекти, од кои пет на тетовското и три на гостиварското подрачје. Во нив биле откриени 32 странски државјанки, најмногу од Албанија (26),  потоа Србија (5) и една од Косово, на различна возраст од 19 до 35 години.   „Странските државјанки во значителен број го злоупотребиле туристичкиот престој, а некои, пак, работеле нелегално во објектите и по нивното приведување и задржување во Секторот за внатрешни работи Тетово, предадени се на Отсекот за прекуграничен криминал, миграции, странци и реадмисија за натамошна постапка“, соопшти полицијата.

Во акциските контроли годинава биле откриени и 24 државјанки на Република Македонија, нелегално вработени во објектите како танчерки, келнерки.