Едно поинакво сончево попладне во Гостивар, четврток 9 април 2020 година

Да беше денес вообичаено четврточно попладне, глетката и атмосферата низ Гостивар ќе беа сосема поинакви. На сончевото и топло априлско време, градот ќе „вриеше“ од луѓе – кој излезен за прошетка, кој на пат кон дома од работа, некој на раат да пазари, друг да стори кафе муабет или касне благце со пријателите во култните гостиварски слаткарници…

Денес, 9 април 2020 година, Гостивар, како и целата Македонија и поголемиот дел од светот нема вообичаено сончево попладне. Од 16 часот почна полицискиот час. Улиците се празни и пусти. Наместо насмеани и безгрижни луѓе, може да се видат само по некое куче и гулаби на градскиот плоштад.

Полициски екипи вршат контрола колку се почитува ограничувањето на движењето, а комуналните работници неуморно се грижат за хигиената во градот.

Граѓаните се затворени во домовите.

Утре е петок. И утре отприлика сликата за Гостивар ќе биде како денес. Тие што мора да работат, ќе работат. Редици пред маркетите и аптеките, луѓе покриени со маски, забрзани да ги завршат обврските.

А во текот на викендот, гостиварци Сонцето ќе можат да го почувствуваат само преку прозорецот, на терасата, во дворот…

Кафе муабетот со пријателите ставен „на чекање“.