Фестивал „Отело“ Гостивар: Полна сала и громогласен аплауз за „Народен непријател“ на МНТ

Вчеравечер во Гостивар, со претставата „Народен непријател“ на Македонскиот народен театар, беше отворен Интернационалниот театарски фестивал „Отело“. Гостиварци покажаа огромен интерес да ја проследат претставата на МНТ од Хенрик Ибзен, во режија на Нина Николиќ., и ја наполнија салата на Центарот за култура АСНОМ.

Во претставата играат: Никола Ристановски, Звездана Ангеловска, Дарја Ризова, Јана Вељановска, Ана Арсовска, Благој Веселинов, Петар Арсовски, Сашка Димитровска, Александар Михајловски, Нино Леви и Григор Јовановски. Екипата целосно го доби вниманието и наклоноста на публиката, која на крај ги награди со громогласен аплауз.

Во рамки на фестивалските вечери ќе бидат изведени уште пет претстави на театри од Македонија, Албанија, Бугарија, Србија и Косово. Вечерва настапува Драмскиот театар од Габрово, Бугарија со претставата „Се надеам ќе играат добро“.

Фестивалот, кој годинава се одржува по седми пат, ќе биде затворен во недела со претставата „Први и последни“ на народниот експериментален театар од Тирана, и со доделување на награди за најдобра претстава, режисер, актер и актерка.

„Отело“ го организира истоименото здружение од Гостивар, со поддршка од Министерството за култура, Центарот за култура АСНОМ и спонзори.

Претставите почнуваат во 20 часот, влезот е бесплатен.