Фолклорот и традицијата во Гостивар како предвесници на празничната велигденска атмосфера

Во пресрет на големиот христијански празник Велигден, кој годинава се чествува на 5-ти мај, градското аматерско културно-уметничко друштво „Браќа Ѓиноски“ вечерва одржа концерт на народни ора и песни. Големата сала во Центарот за култура „АСНОМ“ во Гостивар беше исполнета до последното столче, а публиката уживаше во секој момент од изведбите на играорците, оркестарот, пејачите.

Не се штедеше на „браво“ и ракоплескање, а очекувано најмногу симпатии освоија најмалите членови на друштвото, кои беа поздравени и поддржани со силен аплауз. Забележливо е дека групата на секој настап е се‘ побројна, што потврдува дека расте интересот меѓу дечињата да бидат дел од негувањето на фолклорната традиција и македонските ора.

Специјални гости концертот беа членовите на КУД „Електропорцелан” од Аранѓеловац, Србија, за кои вечерашниот беше прв настапат во Гостивар.

Велигденскиот концерт е традиција што ГАКУД „Браќа Ѓиноски“ ја негува повеќе од 30 години и која наидува на почит од гостиварци како навестување на празничната велигденска атмосфера.