Годинава скоро 300 лица без возачка дозвола, фатени зад волан во Гостивар

Управувањето со возила без положен возачки испит или валидна дозвола е речиси секојдневие низ гостиварските улици. И покрај интензивните контроли на полицијата за откривање и санкционирање на таквите прекршоци, проблемот останува. Поединци седнуваат зад волан, иако немаат положен возачки испит, без да размислуваат за последиците и опасноста.

Статистиката на Секторот за внатрешни работи покажува дека од почетокот на годината биле откриени околу 300 лица кои ги управувале возилата без положен возачи испит и валидна дозвола. Освен тоа, во истиот период сообраќајците фатиле и 70 возачи-почетници, кои не се придржувале на законските ограничувања, предвидени за оваа категорија возачи.

Во текот на јануари, февруари и март полицијата на подрачјето на Гостивар контролирала вкупно 6.127 возила и возачи, при што открила 2.430 најразлични прекршоци по Законот за безбедност на сообраќајот на патиштата и Законот за возила. Поради тоа, 262 возила биле исклучени од сообраќај, од кои дури 188 со истечена и необновена регистрација и 79 технички неисправни.

„Овие и другите прекршоци санкционирани се со 878 прекршочни и 1.522 мандатни платни налози, 24 кривични пријави, 46 барања за поведување прекршочна постапка, како и со 30 писмени опомени, додека 379 од прекршителите се одлучиле за впишување негативни поени“, известува СВР.