Гостивар ќе добие центар за поддршка на млади бизнисмени, иноватори, занаетчии…

Во Гостивар ќе биде отворен Младински ресурсен центар за поддршка на млади претприемачи. Центарот ќе биде регионален и ќе пружа услуги за младата популација од целото полошко подрачје. Ќе се одржуваат обуки, курсеви, младината ќе добива бесплатни стручни совети и насоки за своите бизнис идеи и креации, како и правна помош. Проектот е на Министерството за труд и социјала и Општина Гостивар, во соработка со УНДП, а со финансиска поддршка на Швајцарската Амбасада.

„Се надевам дека овој ресурсен центар ќе продонесе младите луѓе да не бегаат од нашата држава и да остануваат тука, да ги започнат тука своите бизниси, нормално секогаш со поддршка на општината и централната власт“, изјави градоначалникот, Арбен Таравари.

Министерката Мила Царовска рече дека овој центар е од огромно значење за полошкиот регион и ќе биде голема поддршка на младите. „Овој регион има огромен бизнис потенцијал и тоа го гледам од спроведување на мерките и програмите од Оперативниот план за 2019 година. Од вкупно воспоставени 1.484 бизниси од програмата Самовработување за 2019 година дури 350 се во полошкиот регион. Исто така, ме радува што од вкупниот број отворени бизниси дури 38 % се од млади лица. Владата продолжува да инвестира во младите. Со најновата мерка Младински додаток, секое младо лице до 23 годишна возраст вработено во производство ќе добива месечен надоместок од 3.000 денари. Исто така, активните мерки за вработување од Оперативниот план се прават во консултација со бизнисите, се со цел да се овозможи поголема вработливост на младите лица. “, изјави Царовска.

Според најавите, Младинскиот ресурсен центар ќе биде отворен следната година во просториите на поранешниот колеџ „Јахја Ќемал“.