Гостиварката Бериника Арслани ја промовираше својата прва стихозбирка „Среде еден убав сон како бајка“

Во моите раце го држам тивко

мојот син дневник

Ги пишувам моите тивки зборови

и го отворам срцето кон небото.

На неговите страници ги собирам

моите зборови,

моите мисли

во срце ги чувам.

Ги чувам и моментите на насмевка и горчина.

Дури и ако никој не се сеќава на мене

мојот дневник ме чека,

затоа што јас се‘ уште сум жива

и мора да продолжам да го пополнувам.

Во мојот дневник

црвеното се меша со синото пенкало

тоа ги симболиизра моите чувства

измешано, но среќно.

Секоја вечер внимателно

го затворам мојот син дневник…

доаѓа е време за спиење и спуштање на дневникот.

Ова е една од песните во првата збирка поезија на младата Бериника Арсалани, која вечерва беше промовирана во Гостивар. Книгата е во издание на гостиварскиот Центар за култура, каде што и се одржа промоцијата во присуство на бројни гости, роднини, пријатели, љубители на пишаниот збор, професори, личности од јавниот и политичкиот живот. Стихозбирката е на албански јазик, носи наслов „Среде еден убав сон како бајка“ и содржи триесетина песни со различна тематика опфаќајќи го секојдневното размислување и чувства на еден млад човек, љубовта кон семејството, читањето итн.

„Ова е вечер со многу возбуда за мене, пресреќна сум, ви благодарам на сите што дојдовте, вашето присуство за мене е мотив да продолжам да творам. Во оваа прилика сакам од срце да се заблагодарам на сите што ме поддржаа и ми помогнаа да ја издадам мојата прва книга, особено на моите мајка и татко кои ми се најголемата потпора во животот“, рече авторката меѓу другото во емотивното обраќање на настанот во кое прочита и песна посветена на нејзиниот татко.

Директорот на Центарот за култура, Ход Мифтари истакна дека младите таленти се гордоста на Гостивар на која вреди да се пружи поддршка.

„Задоволство ни е што како установа стоиме зад издавањето на стихозбриката на Бериника. Секогаш сме подготвени да ги поддржиме нашите млади таленти и ќе продолжиме да го исполнуваме тоа и во иднина“, нагласи Мифтари.

Рецензент на збирката е магистар Шпенд Бајрами, педагог во медицинското училиште во Гостивар.

„Слободно можам да кажам дека ако прочитате некоја песна од Бериника, сигурно ќе ви се допадне и ќе бидете задоволни, а доколку ја познавате неа лично, ќе споделите посебна емоција при читањето на нејзините стихови.“, рече Бајрами.

Бериника Арслани е родена во Скопје 2004-та година, а живее и твори во Гостивар. Освен со пишување, се занимава и со сликарство и има реализирано самостојна изложа. Добитник е на повеќе литературни и награди за уметност.