Гостиварката Симона Јовановска добитник на наградата „Роман на годината“

Симона Јовановска се закити со наградата „Роман на годината“ за 2021-ва, за своето дело „Денот на црвот“. Веста ја објави Ненад Стевовиќ, косопственик на издавачката куќа Или-Или, која го издаде романот. Наградата ја доделува Фондацијата за унапредување и промоција на културните вредности „Славко Јаневски“, а Јовановска ја доби во конкуренција на 39 романи.

Лауреатот го избра жири-комисијата во состав: претседател Владимир Јанковски и претставниците на Фондацијата Катица Гароска Ацевска, Ермис Лафазановски, Лилјана Пандева и Катерина Богоева.

Наградата се состои од плакета, оригинална статуетка и паричен износ од 150.000 денари.

Симона Јовановска е родена 1985 година, во Гостивар. Во родниот град завршила средно економско училиште, а потоа Економски факултет во Скопје, отсек маркетинг. Во 2015 година ја објавува дебитантската книга раскази „Ги најдов во длабокото“, во издание на „Или-или“. Во 2019 година за расказот „Последниот кат“,го добива второто место на конкурсот на дневниот весник „Нова Македонија“.„Денот на црвот“ е нејзиниот прв роман.

Јовановска живее и работи во Скопје.