Градинката „Пролет“ во Гостивар ќе добие енергетски ефикасна фасада

Во тек се работите за поставување на нова фасада на објектот „Пролет“ во склоп на јавните градинки „Детска радост“ во Гостивар. Со овој проект, за чија реализација се издвојуваат 2,2 милиони денари преку дотации, зградата ќе добие енергетски ефикасна фасада.

„Новата фасада ќе ги исполнува стандардите за постигнување енергетска ефикасност, ќе има модерен изглед изменет во специфичен визуелен и естетски стил. Сето ова е направено за децата и наставниците да ја имаат вистинската удобност при престој.“, соопштија од локалната самоуправа.

Според информациите кои ги добивме од управата на градинките, фасадата ќе биде комплетирана во првата половина на декември.

Претходно во објектот „Пролет“ целосно беа реновирани тоалетите, вкупно шест, со зафат вреден 1,1 милион денари. Вработените добија нови униформи и обувки, а до крајот на годината се најавува реконструирање на столаријата во објектот „Цветови“, каде во  меѓувреме течат работите за доизградба на нов дел и проширување на капацитетот.