Градоначалници на дебата во Гостивар: Како да се мотивираат граѓаните да си ги плаќаат даноците!

Општините тонат во долгови, наплатата на даноци е ниска, а без парите од даноците не може да се реализираат никакви инвестиции – беше потенцирано на денешната дебата на која учествуваа градоначалниците на Гостивар, Куманово и Тетово. Домаќинот, Арбен Таравари информира дека отпочнуваат со кампања за мотивирање на граѓаните за подмирување на обврските кон општината.
„За жал нашата општина е меѓу општините каде наплатата на данок е најниска, генерално во пандемијата. Градоначалникот на Куманово Максим Димитриески вели дека општината имала околу 11 милиони евра долг, а денес не должи ништо, градоначалникот на Тетово, Билал Касами од минатиот мандат наследил 23-24 милиони евра долг, Гостивар е задолжен околу 5 милиони евра. Сакаме да размениме искуства. Затоа и започнуваме кампања, да ги сензибилизираме граѓаните. Како општина сме направиле огромен број на инвестиции, но тие на крај на денот треба да се покријат. Општина Гостивар треба да земе од граѓаните приближно околу 7 – 8 милиони евра, а должи 5 милиони. Затоа сакаме да ги сензибилизираме, да им кажеме дека сите инвестици што се прават практично се собираат пари од даноците.“, изјави Таравари.
Првиот човек на Куманово, истакна дека општините трпат финансиски последици поради ниското ниво на фискална децентрализација.
„Општините се доведени на такво ниско фискално ниво, поради ниската фискална децентрализација во државата, или најголем дел од средставата се трансферираат на централно ниво, а на општините им остануваат основните приходи, односно даноците кои ги плаќаат граѓаните по основ на данок на имот и други даноци поврзани со данок на имот. Кризата, од самото осамостојување не дава можности за граѓаните да плаќаат високи даноци. Тука сме отворено јавно да говориме што можеме повеќе да направиме, секој од нас првенствено како гаѓанин да се запраша што јас можам да направам за мојата општина и што општината може да ми врати. Нема стабилна општина без редовно плаќање на даноците“, рече Димитриески.
И градоначалникот на Тетово, Билал Касами изјави дека наплатата на даноците е ниска, во неговата општина се движи меѓу 20 до 30 % во зависно од видот на данокот и дека е исклучително важно граѓаните да бидат мотивирани да ги подмируваат обврските, за општината да има можности да инвестира.