Хотелиерите може да аплицираат за сместување гости со ваучери за туризам

Министерството за економија објави јавен повик за пријавување на угостителски објекти за сместување на гости со ваучери од 12.000 денари за туризам, наменети за работници со ниски приходи.

На повикот може да се пријават сите категоризирани угостителски објекти за сместување (хотели) кои се лиценцирани и се во туристичките центри во земјава, како и туристичките агенции со А лиценца.

„Основна цел на оваа мерка е да им се овозможи на лицата со ниски приходи да искористат годишен одмор во туристичките центри во Република Северна Македонија и во исто време да им се помогне на туристичките центри во зголемување на обемот на работа“, се наведува во огласот.

Пријавувањето е до 31 мај годинава, а вкупниот буџет за реализација на проектот е 15 милиони денари.

Ваучери за туризам ќе добиваат семејства чии месечни примања не надминуваат 30.000 денари. И за нив претходно ќе биде објавен пивик за аплицирање.