И пролетното сонце знае да пржи – никаде без заштита

Сите го посакувавме топлото време и едвај чекаме сончеви викенд денови за да излеземе од домовите и да уживаме во шетање надвор. Но, колку и да го сакаме сонцето, мора да бидеме внимателни да не ни наштети. Не треба да се залажуваме дека   не ни може ништо, само затоа што не е јули или август. За да си ја зачуваме кожата и нашето здравје, мерки на заштита мора да се преземат. И пролетното сонце знае да пржи и да предизвика проблеми.

Најпрво, набавете наочари со УВ заштита за да си го сочувате видот. Можеби ќе ве чинат малку повеќе пари, но ефектот е голем, па ваквите наочари се секако добра инвестиција.

Не заборавајте да носите капа. Главоболките од јако сонце не се ретки и затоа е најдобро главата да биде заштитена со капа, шешир, марама…Зависно од вашата желба и стил. Одберете светла боја за да ги одбива сончевите зраци. Истото важи и за облеката што ја носите.

Иако одите само на прошетка, а не на плажа, стручњаците препорачуваат да користите крем со заштитен фактор најмалку 15 за оние делови кои ви се изложени на Сонце овој период, како рацете или нозете. За лицето секако задолжително. Истиот да се намачка по кожата во доволна количина, бидејќи ако слојот е тенок, може да ја намали делотворноста за 50 проценти. Лицата со светла кожа и со поголем број младежи, треба да го зголемат факторот на заштита и да користат креми со фактор 30 и 50.

Заштитните спрејови, лосиони, креми се направени од мешавина на хемикали. Неорганските хемикалии ги рефлектираат, односно одбиваат сончевите зраци од кожата, а органските ги апсорбираат штетните УВ зраците, наместо кожата. Како што ги апсорбираат зраците, органските компоненти на кремата полека се распаѓаат и ослободуваат топлина.

Некои неоргански материи, вклучувајќи ги минералите како цинк оксид или титаниум диоксид, делуваат како физички блокатори на сонцето. Тие ги рефлектираат УВ зраците слично како што белата боја ја рефлектира светлината.

Колку е важно што мачкате по кожата, толку е важно каква храна внесувате. Менито во сончевите денови треба да изобилува со: домати, моркови, лубеница, спанаќ, лосос, јагоди, киви, зелка.