Комисијата предлага 58 часа карантин за викендов, Владата се’ уште не донела одлука

Каков ќе биде режимот на движење во престојниот викенд, кога се слават два празника, Бајрам и Денот на сесловенските просветители, до овој момент се’ уште е неизвесно.

Комисијата за заразни болести до Владата доставила предлог, полицискиот час да започне од 19 часот во сабота и да трае до вторник во 5 часот утрото. Информацијата денес ја потврди министерот за здравство Венко Филипче. Причината за ваквиот предлог произлегла од увидувањето дека зголемувањето на бројот на случаи со Ковид 19 изминатите денови е резултат на непочитување на мерките за заштита и групирање на семејни собири.

„Сите  случаи кои ги имавме изминативе неколку денови во огромен процент се должат на настани и семејни собири кои се случуваа деновиве. Токму заради тоа непочитување на мерките, имаме нови случаи. Во таа смисла само ваква ригорозна мерка сметаме дека ќе има вистински ефекти.“, изјави министерот.

Откако на социјалните мрежи и во дел од медиумите се појави информација дека е донесена одлука за викенд карантин, Владата излезе со демант дека до овој момент не одржала седница и нема донесено никаква одлука за ограничувањето на движењето за викендов.

„Денес немаше владина седница и не се донесени никакви владини одлуки. Сите одлуки за мерките за справување со КОВИД-19 се носат исклучиво со владини одлуки. Јавноста веднаш ќе биде информирана кога ќе биде закажана следна седница на Влада, како и за било која следна одлука на Влада“, соопштија од Владата.