Гостиварски „Комуналец“ купува метли на тендер за 200 илјади денари

Јавното претпријатие „Комуналец“ преку јавна набавка бара фирма која ќе го поднови со метли за чистење на улиците. Според наведеното во тендерската документација, предмет на договорот е услуга за изработка на обични црни метли, која фирмата што ќе биде избрана треба да ја заврши за три до пет дена по склучување на договорот.

Во техничката спецификација стои дека претпријатието бара метли со минимална должина од 90 сантиметри и тежина од 400 грама. Планирано е да се набават 6.000 метли, но наведено е дека договорниот орган не е обврзан да ја набави целата количина.

Проценетата вредност на тендерот е 200 илјади денари. Огласот беше отворен на 19 јули, а завршува денес, 24 јули.