Конференција во Гостивар на тема: Каков воздух сакаме?

Зачувувањето на животната средина и квалитетот на воздухот, зависи од сите нас, а еколошката свест се развива и учи од мали нозе – ова беше една од поентите на денешната конференција која се одржа во Гостивар на тема: Каков воздух сакаме? На настанот пред присутните се обрати заменик Амбасадорот на Германија, Петер Шалер, кој ги сподели германските искуства за аерозагдувањето и мерките кои се планираат за негово намалување.

„Работите треба да се менуваат од корен. Во Германија до 2019 година планирано е да се донесе Закон за клима и посебна Програма која предвидува повеќе мерки, како: намалување на производство на електрична енергија од јаглен, а стимулирање на производство од обновливи извори, потоа електрификација во сообраќајот, што значи намалување на дизел моторите, поттикнување на користење на велосипеди и друго.“, истакна Шалер.

Градоначалникот Арбен Таравари рече дека како локална власт се залагаат за чиста животна средина и ќе ги поддржуваат и помагаат ваквите иницијативи.

Настанот се организираше во рамки на посебен проект, кој го реализира Здружението на граѓани “Европски центар за развој, толеранција и соработка”. Проектот трае четири месеци, а опфаќа предавања во училиштата, работилници, кампања за подигнување на свеста како и обезбедување на канти за рециклирање на отпад во училишните дворови.