Контрола на мотоциклисти во Гостивар и Тетово, фрчат казни до 250 евра

Секторот за внатрешни работи Тетово продолжува со контролни активности за поголем ред и безбедност на патиштата и улиците на тетовско-гостиварското подрачје.

Вчера (4 јули) од 18 до 24 часот спроведена е акциска контрола на мотоциклисти, во која биле откриени и санкционирани вкупно 25 прекршоци (Тетово-14 и Гостивар-11). Најголемиот број од прекршоците (17) се однесувале на некористење на заштитен шлем, односно кацига, како и за непоседување возачки дозволи и така натаму. На сите прекршители изготвени им се предвидените поднесоци и ќе се соочат со парични глоби, кои зависно од прекршокот, се движат од 50 до 250 евра во денарска противвредност, извести полицијата.

Секторот за внатрешни работи Тетово со апел до мотоциклистите да не седнуваат зад управувач без положен возачки испит и без потребната заштитна опрема. На мотоциклистите им се советува, исто така, да ја прилагодат брзината, да внимаваат на бучавоста, посебно во вечерните часови и задолжително да ја проверат техничката исправност, односно навреме да ги регистрираат.