Лани низ улиците на Гостивар откриени над 8.800 неисправни возила

Во текот на 2017-та година, гостиварската полиција спровела контрола на над 28 илјади возила кои учествувале во сообраќајот на поширокото гостиварско подрачје. Од нив, 8.893 биле неисправни, поради што биле изготвени над 3.800 прекршочни и над 4.300 мандатни платни налози.

Како што соопштува СВР, лани биле откриени и исклучени од сообраќај 1.033 лица кои управувале најразлични моторни возила без положен испит и валидна дозвола. Најголемиот број од нив,  управувале патнички возила, но и комбиња и камиони или други видови товарни возила.

Не е мал бројот ни на возачите почетници кои не ги почитувале законските ограничувања. Лани ги имало скоро 300. Тие управувале возила со поголема моќност од дозволената или без придружник.

Полицијата најавува дека и годинава ќе продолжува со засилени контроли за поголем ред во сообраќајот на гостиварските простори.