Меморијален марш на годишнината од трагичната автобуска несреќа кај Ласкарци

На 13-ти февруари се навршува една година од трагичната сообраќајна несреќа кај селото Ласкарци која го зави Гостивар во црно, однесе 16 човечки животи и над 35 повредени. Во спомен на жртвите, на истиот датум, следниот четврток ќе се одржи граѓански марш. Иницијативата доаѓа од група планинари, а ќе биде поддржана од Општина Гостивар.

Маршот во должина од околу 55 километри ќе започне на местото каде што се случи автобуската несреќа кај Ласкарци, а ќе заврши на градскиот плоштад во Гостивар.

-Покрај сеќавање на жртвите од трагедијата, со овој марш имаме намера да испратиме порака до надлежните државни институции да ги преземат сите неопходни мерки за поголема безбедност во патниот сообраќај, како и да ги сензибилизираме сите учесници во сообраќајот вакви трагедии да не се повторат“, велат организаторите.

Општина Гостивар ги повика граѓаните што помасовно да учествуваат на маршот, и најави дека дел од него ќе биде и градоначалникот Арбен Таравари со неговите соработници, кои ќе испешачат неколку километри.