Министерот Адеми од Дебреше: Инвестираме во училиштата во Општина Гостивар

Министерот за образование, Арбер Адеми попладнево беше во увид на градежните работи за изградба на спортска сала во ОУ „Фаик Коница“ во гостиварско Дебреше. Од таму, изрази очекување дека салата ќе биде поттик за учениците да спортуваат и да се усовршуваат во спортот.

За разлика од градоначалникот Арбен Таравари, кој во неколку наврати изјавуваше дека Министерството за образование за Гостивар не дава ниту денар, Адеми потенцира дека со пари од буџетот на ресорот што го води во училиштата на гостиварска територија се прават капитални проекти.

„Ова не е единствена инвестиција на Министерството за образование во Гостивар. Ја пуштивме во употреба и спортската сала во ОУ „Мустафа Кемал Ататурк“, а сме реализирале и други капитални инвестиции во училиштата основани од Општина Гостивар и наменети за децата од Општина Гостивар.“, изјави министерот.

Спортската сала во училиштето во Дебреше е со површина од 1.200 квадратни метри, а изградбата чини околу 38 милиони денари.

Според планот треба да биде готова до крајот на декември, а Адеми рече дека очекува работите да завршат и порано, односно на почетокот од новата учебна година.