Мицкоски во Гостивар: Македонија наликува на реално шоу, Заев да се вразуми

„Македонската јавност е сведок на еден театар кој се случува веќе неколку дена. Кога не би било трагично, би било смешно. Државата повеќе или помалку почна да наликува на едно реално шоу, во кое главен актер е претседателот на Владата. Апелирам до него конечно да се вразуми, да сфати дека илјадници животи зависат од неговото однесување, затоа што сето она што го прави ја води Македонија во комплетно погрешна насока.“, изјави вечерва во Гостивар, претседателот на ВМРО ДПМНЕ, Христијан Мицкоски.

На новинарско прашање за негов став за бегството на екс премиерот Никола Груевски, лидерот на ДПМНЕ одговори: „И покрај фактот што Груевски, и голем број други поранешни функционери на ВМРО се жртви на политички прогон од страна на оваа ненародна и криминална власт, предводена од аболираниот политичар, со тој чин не можам нити да се согласам, нити да го оправдам.“

Мицкоски имаше свое обраќање на трибината во Центарот за култура во Гостивар, што ја организираше УМС на тема „Преку Илинден и АСНОМ до Уставот на Република Македонија“. Тој нагласи дека Владата предводена од Заев не остварила ниту едно од дадените ветувања, нема реален допир со потребите на граѓаните и дека на следните парламентарни избори и на престојните претседателски, како што рече – жестоко ќе ги победат.