Моторџиите не носат кациги, низ улиците се вози пребрзо, паркира кој каде стаса…

Периодов се бележи зголемена фреквенција на возила низ улиците и патиштата во полошкиот регион. Од СВР Тетово нагласуваат дека полициски службеници секојдневно преземаат засилени контролни активности за поголем ред и безбедност на сообраќајот.

Вчера (25 јули) од 17 до 23 часот спровеле контрола на мотоцикли, при што биле констатирани и санкционирани вкупно  14 прекршоци (Тетово-12 и Гостивар-2) од кои поголемиот дел, биле за некористење на заштитен шлем (кацига). Во текот на вчерашната контрола биле констатирани и 47 останати прекршоци.

Исто така, вчера во периодот од 8 до 20 часот при засилени мерки и контроли биле констатирани и санкционирани 15 прекршоци (Тетово-8 и Гостаивар-7) пречекорување на максималната дозволена брзина надвор од населено место. Поради погрешно и непрописно паркирање на возилата, од страна на тетовската пајк служба биле подигнати 27 возила, кои биле паркирани поголемиот број во двоен ред на коловозот, пешачки премини крстосници и тротоари, при што го попречувале нормалното одвивање на сообраќајот. На сите возачи – прекршители им биле изготвени и законски предвидените поднесоци додека оние најбрзите кои ја пречекориле брзината ќе се соочат и со заштитна мерка ,,Забрана за управување,, во рок од 3 до 12 месеци зависно од големината на пречекорена брзина.

СВР Тетово постојано го потенцира апелот до возачите да ги почитуваат законските правила и прописи во сообраќајот, да ја прилагодат брзината според условите на патот и пропишаните правила, имајќи предвид дека годинава, исто така, причина за најголемиот број од сообраќајните незгоди, најчесто оние незгоди со потешки последици, била брзината на движење.