На влезот од Речане се гради потпорен ѕид за да се спречат последици од лизгање на земјиште

Покрај патот на влезот во гостиварско Речане, започна да се гради потпорен ѕид за да се спречи пропаѓање на патот и оштетување на куќите од лизгање на земјиштето како последица на интензивните дождови изминатиот период.

„Претходно беше подготвен теренот, а се отвори и алтернативниот пат кон градот. Неасфалтираниот дел под патот што води од селото до каменолмот на магистралниот пат Гостивар-Кичево се прошири и се нивелира, со што се овозможува непречен сообраќај на возилата во двете насоки. Тоа значи дека додека се одвиваат градежните работи, истиот ќе може да послужи како алтернативен пат. Сепак, изведувачот на работите ќе направи сè што може главниот пат да остане прооден“, информираат од локалната самоуправа на Гостивар.

Се очекува градежните работи да завршат во текот на следната недела.