Над 230 казни во Гостивар за користење на мобилен зад волан

Заборавете на мобилниот телефон додека возите! Казните за ваков вид на прекршок, кој е еден од почестите во сообраќајот, изнесуваат 40 евра или 25 негативни поени.

Последиците пак од недоволно внимание на возачите можат да бидат катастрофални. „Разговорите на мобилен го одвлекуваат нивното внимание и ја доведуваат во прашање личната и безбедноста на другите учесници во сообраќајот“, потенцираат од полицијата и апелираат возачите да се воздржат од разговори на мобилен, кога се зад волан.

Минатата година, сообраќајната полиција во Гостивар изготвила околу 230 пријави за несовесни возачи кои муабетеле или испраќале пораки на мобилни телефони.

Освен што сакаат да зборуваат додека возат, гостиварци забораваат и да го користат задолжителниот сигурносен појас. Така, лани казни за ваков вид прекршок биле изречени за 476 лица.

И совозачите треба да покажат совесност и да не им го одвлекуваат вниманието на оние кои возат, во спротивно се соочуваат со глоба од 50 евра.