Над 3000 сообраќајни прекршоци во гостиварско за шест месеци

Статистиката на полицијата за половина година, покажува сообраќајна некултура и несовесност на возачите и пешаците во Гостивар и гостиварско. Дневно во просек по улиците и патиштата биле регистрирани по 17 прекршоци. Вкупно во изминатите шест месеци од оваа година, на поширокото гостиварско подрачје биле откриени над 3000 најразлични сообраќајни прекршоци.

„Најголемиот број од нив се заокружени со законски предвидените поднесоци по Законот за безбедност на сообраќајот на патиштата и Законот за возила, но и со други превентивно-едукативни мерки“, соопштуваат од Секторот за внатрешни работи.

Во овој период, 136 прекршители биле повикани на таканаречена сообраќајна поука, пред се возачи и пешаци, а 150 биле непосредно предупредени. Дури 657 лица се одлучиле за впишување негативни бодови во нивните возачки книшки.

Во првото шестемесечие од годинава биле изготвени над 3100 покани за наплата на глоба и над 2100  платни налози. Од сообраќај биле исклучени 466 возила, од кои 437 со истечена регистрација до 30 и над 30 дена и 29 технички неисправни. Исклучени, исто така, биле и 789 возачи, од кои 607 поради немање возачка дозвола, појава која и годинава бележи нагорна линија, како и управувањето возила од возачи-почетници, кои не се придржувале на законските ограничувања.