Нема изговор – Појадокот задолжителен оброк најдоцна два часа по будење

Утрото речиси за сите е динамичен период во кој сме растрчани во подготовки за дневните обврски: работа, училиште…Поради тоа појадокот често паѓа на дното на нашата листа на утрински приоритети. Лекарите јасно и гласно кажуваат дека изговори не треба да има и појадокот не смее да се прескокнува. Нутриционистите советуваат дека утринскиот оброк треба да се изеде во рок од  два часа по будењето. Дури и доколку не се чувствувате гладни, како што е случај со повеќето луѓе наутро, мора да појадувате, за да обезбедите енергија, покренување на организмот, концентрација.

Она што многумина од нас го грешат е изборот на пециво за појадок. Нутриционистите се децидни и велат не за кифли, крофни и било какви пецива за појадок. Наместо тоа одберете јогурт со некое овошје ако сте во брзање, а доколку имате време подгответе си јајца кои се извор на протеини и хранливи материи добредојдени за старт за денот.

Овесната каша исто така е секогаш добар избор за наутро. Богата е со омега 3 масни киселини и калиум и докажано е дека го смалува нивото на холестерол во крвта.

За солиден појадок се смета и една банана, ако баш немате време и прилика за нешто друго.

Она што е интересно е докажаниот факт дека луѓето кои појадуваат многу полесно ја регулираат тежината и не се дебелат за разлика од оние кои го прескокнуваат појадокот. Се разбира само ако станува збор за здрав оброк.