Најубавата боза ја прават гостиварските слаткари

Рецептот за бозата, освежителен пијалок, омилен на многу луѓе бил измислен пред неколку илјади години. Постојат податоци според кои името на пијалокот „боза“ потекнува од персискиот збор „бузе“, што значи пијалок од просо и ориз.

Бозата се прави од брашно, кое се вари, течноста се прецедува, се лади и се засладува. Потоа се додава квасец по што почнува процесот на ферментација од 24 часа. Вака отприлика е основниот рецепт, но тајната на добрата боза си ја знаат само бозаџиите и не ја споделуваат во јавноста. Гостивар може да се пофали со долга зачувана традиција на создавање боза по рецепти кои се пренесуваат со генерации. Во гостиварските слаткарници со убавите слатки задоволства речиси секогаш се пие чаша добра боза.

Зошто е корисна бозата?

Со оглед на начинот на подготовка, бозата изобилува со пробиотици кои се корисни за дигестивните органи и олеснување на стомачните тегоби. Содржи протеини и минерали како железо, калциум, потоа органски киселини и витамини од Б групата. Се препорачува за пиење и за подобрување на видот, потоа регулирање на крвниот притисок, против главоболка и после напорна физичка активност.

Ако од текстот ви се јави желба за вакво освежување, знаете што треба да направите – тркнете до слаткарница и почестете се со чаша гостиварска боза.