Носете си лична карта за во аптека, државата гарантира дека лекови ќе има преку цел месец

Од утре започнува да важи укинувањето на квотите за лекови на рецепт, што значи дека во аптеките би требало да има лекови за граѓаните на државен трошок преку целиот месец. За да го подигнат лекот, граѓаните задолжително ќе треба да се легитимираат со лична карта или со пасош.

„Граѓаните ќе може да добијат лек од која било аптека, во кое било време без разлика дали е почеток или крај на месец. Се елиминираат турканиците во првите денови од месецот заради препишување на рецепти. Легитимирањето, сепак не значи дека постарите лица кои не можат да дојдат до апетка и помладите од 18 години ќе останат без лековите. Во нивно име ќе можта да ги подигнат нивни блиски“, рече директорот на Фондот за здравствено осигурување, Ден Дончев.

Владата смета дека со оваа реформа ќе се спречат злоупотреби со издавање лекови без реални потреби, како и со создавање домашни залихи од пациентите од страв дека на крајот од месецот може да го снема нивниот лек.

„Мерката е многу значајна заради тоа што дефинитивно отстранува една тешкотија со која живееја граѓаните. Јас верувам дека заедно со целиот пакет мерки што ги воспоставуваме во здравствените услуги се отвора процес за обезбедување поквалитетно здравство за сите. Достапноста и навремениот пристап до лекови за граѓаните е многу значајна работа како дел од здравствениот систем како приоритет владата за сите граѓани од различни возрасти“, рече премиерот Зоран Заев.

„Со достапни лекови во секое време, како и воведување на нови лекови, вработувања, зголемени плати и дежурства на здравствените работници, со подобрување на условите во јавните здравствени установи, како и максимална грижа за пациентите го враќаме достоинството во јавното здравство, за задоволни пациенти и задоволни здравствени работници“, потенцираше министерот за здравство, Венко Филипче.