Нуредини: Привршува реализацијата на брзите мерки за санација на Русино

Министерството за животна средина информира дека минитерот Насер Нуредини денеска беше во теренска обиколка на нестандардизираната депонија во Русино кај Гостивар, каде во тек е реализацијата на брзите мерки за санација на депонијата.

Досега се реализирани сите подготвителни работи, поставена е колската вага за мерење на количини на отпад, во тек е изградба на насипи и воспоставување на системот за управување со протекување на исцедокот. Започнато е и асфалтирање на патот до депонијата, a паралелно се работи и на подготовката на документација на алтернативен пат до Русино од патот Гостивар – Маврово, соопштија од Министерството.

Од таму додаваат дека согласно динамичкиот план, се очекува брзите мерки да бидат целосно завршени до крајот на август годинава, по што ќе се започне со втората фаза од проектот и управувањето со Русино ќе биде предадено на заедничкото јавно регионално претпријатие Русино/Полог, формирано од сите општини од Полошкиот плански регион.