Одземени надлежностите на Таравари за поставување и разрешување директори во училиштата

Градоначалникот на Општина Гостивар, Арбен Таравари остана без ингеренции во образованието кои се однесуваат на разрешување и именување директори во училиштата. Причините зошто е  донесено решение за одземање на надлежостите, ги образложи министерката за образование и наука, Рената Десковска, денес на седницата за пратенички прашања.

„Во дописот од Државниот просветен инспекторат има укажувања за сите нерегуларности што се направени во постапката за разрешување на директори и именување. Инспекторат донел решение, градоначалникот на Гостивар да ги исправи процедурите, но тоа не е направено.  Единствената законска можност која ни беше на располагање за да се воспостави владеење на правото почитување на Законот за основно и средно образование беше одземање на надлежностите“, рече министерката.

Одземањето на надлежностите ќе биде на сила девет месеци.

Од општина Гостивар рекоа дека до овој момент се уште го немаат добиено решението за одземање на надлежностите и дека ќе излезат со став и реакција, откако документот ќе го добијат официјално.