Околу 250 граѓани од трите општини во гостиварско извршиле увид во Избирачкиот список

За една недела откако почна јавниот увид во Избирачкиот список, во подрачната канцеларија на Државната изборна комисија во Гостивар, се обратиле 256 граѓани да ги проверат своите податоци. Најголемиот дел од нив биле од општина Гостивар, а помалку од руралните, Врапчиште и Маврово Ростуше. Од канцеларијата оценуваат дека интересот за јавен увид е слаб, но сметаат дека тоа се должи на можноста проверката да се изврши преку интернет, што за граѓаните е побрзо и поедноставно.

Од сите, кои до сега извршиле увид, само еден граѓанин го немало во спискот и за него е поднесено барање за запишување. Кај останатите немало потреба за никакви промени и додавање.

Јавниот увид во Избирачкиот список за Локалните избори 2017, трае до 9-ти септември. Може да се врши секој ден, вклучително сабота и недела од 8 и 30 наутро до 19 часот навечер. Последниот ден, како и на 4-ти септември кога е краен рок за пријавување независни кандидати и листи, увидот ќе трае до полноќ. Инаку до сега, за општините Гостивар, Врапчиште и Маврово Ростуше нема барање за собирање потписи за независни кандидати.