Општина Гостивар издвојува 1,1 милиони денари за Албанија

Советот на Општина Гостивар, денес на вонредна седница донесе одлука за доделување на парична помош за семејствата погодени од разорниот земјотрес во Албанија. За таа намена од општинскиот буџет ќе бидат издвоени околу 1,1 милиони денари. Дел од средствата ќе се префрлаат како дирекна финансиска помош, а со дел ќе се набават потребни материјални добра, кои ќе бидат доставени во загрозените подрачја.

„Гостивар е град којшто е познат по своето големо срце и сакаме тоа да го покажаме и овојпат. Загубите се големи и човечките животи ништо не може да ги надомести. Сепак, предизвикани се и огромни материјални штети и се надеваме дека со нашиот скромен придонес, ќе успееме барем малку да помогнеме, во рамки на нашите можности. Затоа, ве повикувам вас како советници да ја поддржите одлуката за доделување на средства од општинскиот буџет.“, рече градоначалникот, Арбен Таравари на денешната вонредна седница на Советот, свикана токму по повод земјотресот.

Одлуката за издвојување пари за помош на Албанија беше донесена едногласно. Советот прогласи и триднeвна жалост, од денес до петок.

На седницата, исто така се усвои и одлука за формирање на кризен штаб, во кој ќе членуваат: градоначалникот, директорите на јавните претпријатија, претседателот на Советот, секретарот на општината, директорот на Здравствен дом и командирот на Полициската станица.

Општина Гостивар денес и утре спроведува и хуманитарна акција, во која може да се приклучат сите граѓани и компании. Донациите во вид на нерасипливи прехранбени продукти, средства за хигиена, ќебиња, вреќи за спиење лекови и слично треба да се достават во објектот на Противпожарната служба.

Тим пожарникари од Гостивар од вчера е испратен да пружа помош на терен во Драч, а општината донираше 300 ќебиња.