Осомничените за полов напад на малолетничка добија триесетдневен притвор

Судија на претходна постапка од Основиот суд во Гостивар определи мерка притвор во траење од 30 дена за три лица, осомничени за дело „полов напад врз дете кое не наполнило 14 години“.

Случајот што ја вознемири јавноста, беше пријавен изминатиот викенд. МВР соопшти дека по претходна пријава за обљуба на малолетно девојче, во куќа во гостиварско село биле затекнати и приведени три лица, а по други двајца се трага.

„Во вршењето на ова кривично дело учествувале осомничените, но и други лица за кои во моментов се преземаат дејствија за нивно пронаоѓање и идентификација. Детето на возраст од 13 години било во повеќе наврати злоупотребувано од страна на возрасни лица. До овој момент е утврден идентитетот на петмина сторители, од кои тројца се лишени од слобода, за двајца е распишан распис за нивно пронаоѓање. Според првичните информации постои веројатност во предметот да бидат опфатени и други лица.“, соопшти Јавното обвинителство.