Остануваат само уште две слободни места за плејофот на Лигата на шампионите

Во фудбалската Лига на шампиони синоќа завршија натпреварите во групите сегмент А-Д по кои познати се 14 од 16 учесници во осминафиналето.

Според резултатите во плејофот се пласираа Копенхаген и Наполи.

Копенхаген го победи Галатасарај со 1:0 во последното, 6. коло од Лигата на шампионите и го освои второто место во групата А. Така данскиот клуб првпат по сезоната 2010/11 стигна до плејофот во Лигата на шампионите.

За разлика од Копенхаген, Манчестер јунајтед не успеа да ја помине групата, а воедно не успеа ниту да биде трет и со тоа да продолжи во Лига Европа. Јунајтед синоќа загуби на домашен терен од Баерн Минхен со 1:0.

Наполи ја победи Брага со 2:0, Елиф Елмас влезе во 60.минута. Саци во деветтата минута си постигна авто гол, а во 33. стрелец беше и Осимен. Наполитанците обезбедија пласман во нокаут фазата во Лигата на шампиони (ЛШ), како второпласирани во групата Ц, зад Реал Мадрид.

Претходно во осминафиналето место си обезбедија: Арсенал, Атлетико, Баерн Минхен, Барселона, Борусија Дортмунд, Интер, Лацио, Лајпциг, Манчестер сити, ПСВ, Реал Мадрид и Реал Сосиедад.

За последните две места во плејофот претендираат Милан, Њукасл, ПСЖ, Порто и Шахтјор.