ОУ „Единство“ го прослави патронатот со повеќе активности – пензионираните наставници добија благодарници

Во гостиварското основно училиште „Единство“ денес беа организирани еколошки, спортски и културни активности, по повод патрониот празник. Училиштето го слави Денот на планетата земја, 22-ри април како патронат од пред неколку години и акцентот во настаните за одбележување е ставен на екологијата и чистата животна средина.

Основците изработуваа уметнички дела на тема планетата Земја, а и на свечената манифестација беа пренесени пораки за поголема грижа за околината.

Не беше изоставен ни спортскиот дух. Спортската сала беше резервирана за учениците кои го сакаат и негуваат спортот.

Посебно внимание на патронатот беше посветено на пензионираните наставници од училиштето. На четириесетина од нив им беа доделени благодарници за дадениот придонес во образување на децата и развој на училиштето.

Во ОУ „Единство“ во Гостивар настава посетуваат околу 1.400 основци, на трите јазици: македонски, албански и турски.