Палењето на Русино е АЛАРМАНТНО, гостиварци се загушија во чад!

Состојбата со депонијата Русино, каде изминатите месеци отпадот често гори, вчеравечер   ескалираше. Гостивар се загуши во чад и смрдеа. Граѓаните преку социјалните мрежи револтирано реагираа. „Не се дише. Ова е отров. Доста ни е труење“ – се само дел од загрижувачките статуси и пораки на гостиварци од синоќа.

Алармантноста ја потврдија и мерните станици за квалитет на воздухот кои покажаа енормни вредности на загадување.

Воздухот не е расчистен ниту утрово.

Граѓанската иницијатива „Стоп Русино-чист воздух за Гостивар“ предлага повеќедневно блокирање на патот кој води до депонијата, привремено да се оневозможи транспортот на ѓубре како и во знак на предупредување дека граѓаните го загубија трпението и бараат најитно решавање на проблемот. Најпрво, да се спречи горењето, а потоа дислокација на Русино.

Иницијативата пред неколку дена организираше протестно дефиле по градските улици, се до депонијата. И тогаш беа испратени пораки за сериозноста на состојбата и ризикот по здравјето на граѓаните.

Русино е одредена како регионална депонија за Полог, а според најавите, нејзино стандардизирање треба да отпочне во рамки на проектот „Управување со цврст отпад во Полошкиот регион“.  Менаџирањето со депонијата треба да го преземе регионално претпријатие. Но, процедурите за избор на членови на управниот и надзорниот одбор се стопирани заради изборите.

Додека се одолговлекуваат формалностите, Русино гори, Гостивар е соочен со еколошка катастрофа.

фото: Небојша Петревски