Парите се канал за пренос на инфекции: Помалку со готовина, повеќе со картички

Народна банка апелираше на зголемување на свесноста и одговорноста околу ширењето на коронавирусот со редуцирање на употребата на готовина и препорака до банките да разгледаат можности за намалување на провизиите за безготовински плаќања.

„Со оглед на тоа што готовината се смета за еден од честите канали за пренос на инфекцијата, а заради превенција од евентуално пренесување на заразата, повторно апелираме да се намали употребата на готовина, а да се зголеми употребата на платежните картички и останатите алтернативни, електронски начини на извршување на трансакциите. На таков начин ќе го заштитите сопственото здравје, како и здравјето на сите околу вас. Воедно, им препорачуваме на банките да ги разгледаат можностите за намалување на провизиите поврзани со безготовински трансакции.“, информира Народна банка.

Надлежните соопштија дека за намалување на ризиците од употребата на денарската готовина, воведени се зајакнати протоколи за постапување, коишто се однесуваат на редовно повлекување на банкнотите и монетите што се во циркулација и нивно чување во карантин пред повторното пуштање во промет, а воедно укинати се и провизиите коишто ги наплатуваат од банките за полагање и подигање денарска ефектива.

„Би сакале особено да посочиме на претпазливост при користењето на странската готовина (девизи) којашто е внесена од друга држава и носи висок ризик од пренесување на заразата. Препорачуваме неа да ја размените во овластените банки и менувачници, по што ќе се применат посебни мерки за постапување и со оваа готовина, за да се намали можноста за пренесување зарази преку овој канал.“, соопшти Народна банка.