Пазарен ден: По кои цени се продаваат зеленчукот и овошјето?

Дождливото време не ги поколеба гостиварци во вторничниот пазарен ден да излезат и да си пазаруваат на градскиот пазар. Понудата на тезгите богата и разновидна, а цените формирани според сезоната на она што се продава, повисоки за несезонските, а поефтини за сезонските производи.

Најголемиот дел од трговците ги продаваат портокалите и мандарините по три килограми за 100 денари, додека јаболката по 50 и 60 денари за килограм. Морковите денес одат по цена од 30 денари за килограм, зелката по 15 денари, краставиците држат повисока цена од 120 денари, патлиџанот по 80 денари, а парче марула, како и млад лук и кромид можат да се најдат по 15 и 20 денари. Купувачите различно ги коментираат цените. За едни се прифатливи, други велат дека трговците претеруваат.

Меѓу продавачите има и такви кои редовно доаѓаат од други делови на Македонија. Сретнавме еден брачен пар од Кавадарци кој секој вторник им нуди зеленчук на гостиварци.  Велат дека со своите производи добро им оди на гостиварскиот пазар и солидно заработуваат.

Освен овошје и зеленчук на градскиот пазар во Гостивар во вторник вообичаено се продаваат и јајца, мед, сирење, кокошки, облека и друго.