Платата не стасува за сметки и леб, скоро 34.000 денари требаат за основни трошоци

Расте сумата на основните трошоци за живеачка. Во период од една година, минималната синдикална кошница за четиричлено семејство се зголемила за околу 1.000 денари.

Според пресметките на Сојузот на синдикати на Македонија, за ноември 2020-та, синдикална кошница изнесува 33.742. Толку пари му се неопходни на семејството за да ги задоволи најосновните потреби како храна, плаќање сметки, лекови и слично. Минималната плата со закон е 15.000 денари, додека просечната околу 27.800 денари, што значи дека примањата не стасуваат да се турне месецот.

Според ССМ најмногу пари, околу 14.149 денари, одат за храна и пијалоци, по што следуваат трошоците за домување (комуналии, покуќнина и одржување) со износ од 10.808 денари. За лична хигиена и хигиена во домот, семејствата одвојуват 2.375 денари од буџетот, за превоз, околу 2.500 денари, додека за облека и обувки 2.160 денари.