По 2 месеци за прв пат петочна молитва во џамиите, гостиварското Муфтиство апелира да се почитуваат мерките

Петочната молитва за муслиманските верници, за прв пат после два месеци ќе се одржи во џамиите. Од гостиварското Муфтиство информираа дека се преземени сите мерки за заштита од коронавирус според протоколот на ИВЗ и Министерството за здравство и упатија апел граѓаните да ги почитуваат препораките.

Во протоколот за џамиите на ИВЗ се наведуваат следните мерки: дезинфекција на џамиите, задолжително носење маска, чистење раце со средство за дезинфекција при влезот во џамијата или да се носи ракавици, секој верник треба да има лично сеџаде ​(простирка за намаз), да се одржува физичката дистанца меѓу верниците колку што е можно повеќе, забрането групирање пред или по обавување на молитвите во џамијата, абдест да се зема дома – џамиските простории за абдест и тоалетите ќе бидат затворени​.
Џамиите беа отворени за верниците на 12 мај со одлука на ИВЗ.