По кој знае кој пат вандализам во детско катче во Гостивар

На несовесноста на поединци, се чини и‘ нема крај. Едно од детските катчиња во градскиот парк во Гостивар остана со искршени и уништени лулашки, лизгалки и други реквизити, откако било мета на вандали. Ова е само еден во низата вакви случаи на јавните површини во градот. Низ паркот, на шеталишето крај Вардар, и на други јавни локации урбаната опрема честопати е демолирана. Сторителите се нафрлаат на она што ќе им се најде пред очи, кршат од елементи во детските игралишта до клупи, канделабри, корпи за отпад…

Од Јавното претпријатие за паркинзи и зеленило потврдија дека вандализмот е честа појава и упатија апел на поголема совесност и одговорно однесување кон јавното добро.

„За жал ваков вандализам многу пати се случува. Ние се трудиме потоа да ги обновуваме тие реквизити за децата и другата урбана опрема што се уништува, но за некое време се повторува истото. Апелирам да се подигне свеста кај луѓето кога е во прашање јавното добро, да се чува, а не да се уништува опремата, тоа е од корист за сите нас“, вели директорот на претпријатието Џелал Луши.

Надлежните изразуваат надеж дека апелите ќе допрат до поединците што се однесуваат деструктивно и дека во иднина ќе нема такви лоши глетки низ јавните површини.