„Почитувај ја различноста“ стартуваше од ОУ „Гоце Делчев“ во Гостивар

Да се надминат предрасудите, да нема насилство и на различностите да се гледа како на придобивка, а не како на проблем. Ова беа пораките од денешната работилница, која се одржа во ОУ „Гоце Делчев“ во Гостивар, во рамки на проектот „Почитувај ја различноста“, што го спроведува Секторот за внатрешни работи Тетово со поддршка на локалната самоуправа.

Работилницата беше интерактивна и во презентациите учествуваа самите ученици кои ги пренесоа и споделија своите искуства и знаења.

„Нашето училиште повеќе години спроведува проекти во соработка со Отсекот за превенција на МВР. Секоја учебна година се организираат работилници кои ги третираат темите како насилство, злоупотреба на психотропни супстанци и слично. Ваквите настани, каков што е и денешниот, се од голема корст за учениците“, изјави Сашо Шарески, директор на ОУ„Гоце Делчев“ во Гостивар.

„Со ваквите работилници се подигнува свеста кај младите во насока на почитување на мултиетничноста и превенција на насилство. Ние како општина, и во иднина ќе ги поддржуваме ваквите активности“, рече Сеадин Ејупи, шеф на кабинет.

Проектот „Почитувај ја различноста“ ќе се реализира и во училиштата „Единство“ и „Мустафа Ќемал Ататурк“, како и во три тетовски основни училишта. Предвидено е да трае околу два месеци.
Носител на активностите е Отсекот за превенција во соработка со ОБСЕ.