Почна пријавувањето за бесплатен одмор

Согласно Програмата за поддршка на домашен туризам за работници со ниски приходи, Министерството за економија објави Јавен повик за организирање на одмор на работници со ниски приходи. „Основна цел на овие проекти е да им се овозможи на лицата со ниски приходи да искористат годишен одмор, и во исто време да им се помогне на туристичките центри во зголемување на обемот на работа надвор од туристичка сезона“, соопштија од Министерството.

За бесплатен одмор може да се пријават сите граѓани кои се вработени и нивните месечни примања во семејството не надминуваат 22.000 денари. Потребни документи за пријавување се:

-потврда од работодавецот за висината на исплатена нето плата од последните три месеци и извод од банка за последните три месеци за подносителот на барањето како и на членовите на семејството (сопруг, сопруга и деца) кои заедно со него ќе го користат одморот;

-фотокопија од лична карта или патна исправа за него и членовите на семејството кои заедно со него ќе го користат одморот и

-изјава дека барателот лично или со членовите на семејството  кои се наведени во барањето ќе го користат одморот.

За одмор во траење од пет дена во некој од трустичките центри во Македонија, за семејствата ќе бидат обезбедени по 15 илјади денари. Пријавувањето трае до 29 септември, а барањата се поднесуваат во Министерството за економија лично или преку пошта на адреса (Јуриј Гагарин бр. 15 Скопје).