Почнува првата фаза од Пописот 2021

Со дијаспората, армијата, дипломатските претставништва, бездомниците и затворениците стартува Пописот 2021.

Од денес до до 15 март, сите вработени во Дипломатско – конзуларните претставништва, вклучувајќи ги и нивните семејства, ќе можат да се само-попишат, или самостојно да се регистрираат, преку он-лајн апликацијата изготвена од Државниот завод за статистика. Во исто време, процесот започнува и за дијаспората, кои до 21 април, или во следните 50 дена, на ист начин, со пристапување до апликацијата, ќе можат да го остварат ова право и граѓанска обврска.

„Пописот е добар пример преку нашата проактивна улога да демонстрираме одговорност и посветеност кон дијаспората, која има важна улога во севкупните процеси на земјава. Ова е добра шанса да покажеме грижа за нашите граѓани во странство и да создадеме услови за трајна соработка, за брза комуникација и блискост, остварувајќи ја со тоа клучната цел – дијаспората да биде нераскинлив дел од земјава”, изјави Министерот за надворешни работи, Бујар Османи.

Во периодот од 1 до 15 март заедно со Министерството за одбрана ќе бидат попишани лицата што за време на Пописот се наоѓаат во служба на АРМ во државата или во странство, заедно со Министерството за правда ќе се изврши попишување на лицата што за време на Пописот се наоѓаат во притвор или на издржување казна затвор во затворите, казнено-поправните установи и воспитно-поправните домови и заедно со Министерството за труд и социјална политика ќе бидат попиани лицата бездомници.

Пописот на целото население ќе се спроведе од 1 до 20 април.