Подготовки за прослава на Водици во Гостивар, доделени Благодарници на поддржувачи и соработници

Со елан и позитивна енергија вчеравечер во Гостивар официјално започнаа подготовките за годинешото чествување на големиот христијански празник Богојавление-Водици.

На координативен состанок свештенослужителите од гостиварското архиерејско намесништво, Иницијативниот одбор и кумовите на славата ги дефинираа деталите околу обврските кои вклучените треба да ги преземат и натамошните чекори за достоинствена и величествена прослава на празникот.

На поддржувачи и соработници им беа доделени Благодарници за дадениот придонес во одбележувањето на Богојавление-Водици во Гостивар.

„Доделуваме Благодарници на сите оние кои ја поддржуваат и помагаат манифестацијата откако се возобнови традицијата, тоа се фирми кои донираа средства, наши пријатели и поединци кои секогаш се присутни да помогнат околу организирањето. Се надеваме дека секоја година ќе бидеме се‘ побројни и ќе го шириме нашето православно друштво. Наше е секоја година да продолжиме со организирање на оваа манифестација, да го величиме  нашето православие, вера и она што го почнавме како Иницијативен одбор“, беше речено на состанокот.

Благодарница доби и нашиот медиум Gostivarpress.mk.

Традицијата на чествување на Водици со положување на светиот крст во водите на Вардар во Гостивар, по пауза од 70 години беше возобновена во 2015 година.