Полицијата апелира моторциклистите да носат кацига – за непочитување казна од 50 евра

Со затоплувањето на времето на тетовско-гостиварското подрачје се зголемува бројот на моторциклисти по улиците, особено во доцните попладневни и вечерните часови.

Во таа насока Секторот за внатрешни работи Тетово апелира до моторциклистите задолжително да поседуваат соодветни возачки дозволи, навреме да ги регистрираат мотоциклите и да користат заштитна опрема, пред се кацига. „На моторциклистите им се советува, исто така, да ја прилагодат брзината според условите на патот и да не се движат еден до друг, туку еден позади друг. Покрај ова, не смее да има превезување на моторциклите на повеќе лица од законски дозволеното и без потребната опрема.“, се наведува во соопштението.

Од полицијата нагласуваат дека минатиот и овој месец ги засилиле контролните активности во чие средиште се моторциклистите, а најчест прекршок е некористење заштитна опрема.

Паричната глоба за овој вид прекршок изнесува 50 евра во денарска противвредност.