Полициски апел: Во Маврово се очекуваат гужви, не ги оставајте возилата на патот околу езерото

Во пресрет на продолжениот новогодишен викенд и празнувањата, кога се очекуваат голем број на домашни и странски гости во зимскиот туристички центар Маврово, полицијата апелира на совесност и внимателност од страна на возачите.

„Со оглед на тоа дека синоптичарите наредниве денови најавуваат снежни врнежи, особено на повисоките места, апелираме моторните возила, да не се оставаат на коловоз долж кружниот пат околу Мавровското Езеро. Така оставените возила го попречуваат брзото и ефикасно отстранување на снегот од операторите за зимско одржување и во голема мерка создаваат потешкотии во одвивањето на сообраќајот во двете насоки. На возачите, исто така, им се советува задолжително носење зимска опрема и максимална внимателност, дотолку повеќе што на одредени места патот околу Мавровското Езеро е со несоодветна широчина и поради тоа отежнато е нормалното и безбедно разминување“, стои во апелот од Секторот за внатрешни работи Тетово – Полициско одделение Маврово.

До сите гости кои празниците ќе ги поминуваат во Маврово се апелира и да не го нарушуваат јавниот ред и мир со пукање од огнено оружје или на друг начин со цел празниците да поминат без инциденти или други несакани појави.