Поради невреме одложен 56. Мавровски меморијал

Лошите временски услови го одложија денешниот старт на 56. „Мавровски меморијал“ во скијачко трчање, на кој се очекува да настапат педесетина ски-тркачи од Македонија, Србија, БиХ, Хрватска, Грција, Турција и Бугарија.

Невремето, проследено со силен ветар и наносите на снег, како и температурата од -10 степени целзиусови беа причина селекторот на македонската нордиска репрезентација, Ѓоко Динески да соопшти дека нема услови за одржување на трките, пренесува Спорт1.

Според планот, денеска од 10.30 часот требаше да се одржи трката во женска конкуренција на пет километри, додека од 11 часот беше закажана трката во машка конкуренција на 10 километри, но времето ги расипа плановите.

Стартот е одложен за утре, за кога се очекуваат подобри временски услови.