Поставена спомен плоча во чест на полицаецот Ѓурчиновски кој загина во несреќа на патот Гостивар-Тетово

Една година по трагичната несреќа кај Тумчевишка клучка, во која животот го загуби 23 годишниот полициски службеник Петар Ѓурчиновски, поставена е спомен плоча на местото на кобниот настан.

Колеги, роднини, пријатели му одадоа почит на младиот полицаец, чиј живот згасна прерано и положија букети цвеќе.

„Една година без тебе меѓу нас, но секогаш без престан со тебе во нас, во нашите мисли и сеќавање. Голема, огромна е болката која длабоко пече и не престанува Петар, силно притиска празнината дека овоземски не си веќе во мигот на денот сегашен, дека те нема вчера, денеска, дека пак ќе те нема утре, задутре и за навек. Меѓутоа веруваме дека некаде од таму горе ти не гледаш севезден, зашто ти беше нераскинлив дел од нас и нашата служба. Пиетет Петар и до земја наклон за твојата професионалност, за твојата посветеност кон службата, за твојата пожртвуваност и многупати покажаниот самопрегор. За твоето цврсто професионално Јас и Разбирам командире, од кои ниту милиметар не отстапи, не се повлече до последниот здив. Почивај во мир колега, голем човеку. Меѓу ангелите. Зашто ти беше со англески лик и широка благородна душа. Ние секогаш, вечно ќе те паметиме“, подвелече во обраќањето Војче Смилески, заменик командир на ПС ОН Гостивар.

Несреќата во која загина Петар Ѓурчиновски се случи лани на 28 декември на автопат Тетово – Гостивар, во близина на Тумчевишка клучка. Најпрво возило „форд фокус“ со кичевски регистарски ознаки, удрило во Ѓурчиновски и неговиот колега, додека извршувале работни задачи – обезбедување на место на настанот од претходно случена сообраќајна незгода. Потоа и друго возило „фолксваген голф“ со тетовски регистарски ознаки кое се движело во правец Гостивар – Тетово, удрило во младиот полицаец.