Повредени две лица: Излетале од автопатот и завршиле на паркинг на ресторан

Жител на гостиварско Чајле и Германка се повредени во сообраќајна несреќа која се случила синоќа на автопатот Гостивар-Тетово. Настанот за кој информираат од Секторот за внатрешни работи, наликува на филмско сценарио.

Четириесет и тригодишниот возач и неговата шеесет годишна сопатничка од Германија, по автопатот се движеле во автомобил „форд фиеста“. Во еден момент од засега неутврдени причини возилото изгубило контрола, излетало од коловозот и превртено на покривот завршило на паркинг на еден угостителски објект лоциран во близина. Во несреќата двајцата во автомобилот се здобиле со повреди и биле пренесени во гостиварската болница, каде им е укажана лекарска помош.

Првичните сознанија зборуваат дека причина за сообраќајката е пребрзото возење. Материјалната штета се проценува на 250 илјади денари. Инаку, автомобилот кој го користеле повредените бил од рент-а-кар агенција.