Пожар пеплоса куќа – повредени нема

Осумдесет и едногодишна жена остана без кров над главата, откако оган ја проголта нејзината куќа во долнореканското село Врбјане. Пожарот бил пријавен вчера попладне, околу 16 часот и 30 минути во Полициската станица Ростуше.

Куќата, инаку доста стара градба, била зафатена од оган и за кратко време изгорела целосно, информираат од полицијата. Освен домот на старицата, пламените јазици ја пеплосале и нејзината плевна. Пожарот се проширил и на делови од покривна конструкција на два соседни објекти како и на уште една плевна во близина. Со интервенција на противпожарните единици на Дебар и Гостивар, огнот бил локализиран во 17 часот и 45 минути.

Во пожарот нема жртви, ниту повредени лица, а навреме бил отстранет и добитокот, но причинета е значителна материјална штета. Целосен увид ќе се врши во текот на денешниот ден за да се утврдат причините и другите поединости. Жената во меѓувреме е згрижена кај роднини.

Ова е втор пожар во куќа летово во Врбјане. Неодамна мало девојче се здоби со тешки изгореници во пожар во истото село.